التقويم المصري انجاز حضاري, من تأليف وتمثيل وإخراج المصري القديم.
جيمس هنري بريستيد بيرصد نقل فكرة التقويم من مصر للعالم, ص 22 تاريخ مصر القديم:
… ” يوليوس قيصر الرومان هو أول من أدخل التوقيت المصري إمبراطوريته, ثم عم إستعماله العالم” …
……
أما عن بداية استخدام التقويم المصري, فيه شبه اجماع بين الكتاب, انه بدأ فـ مصر, وبالتحديد العاصمة “أون” -عين شمس الحالية- سنة 4241 قبل ميلاد السيد المسيح!
……
الباقيين اليوليانى (نسبة ليوليوس قيصر) نقل مضمون التقويم المصري, مع بداية جديدة للسنة, وأسامي شهور روماني
تقويم الشهداء, أو التقويم القبطي, نقل مضمون التقويم المصري, بنفس بدايته ونهايته ونفس أسامي الشهور المصرية القديمة!
بالمناسبة أسامي الشهور المصرية الحالية, موجود معظمها من عهد الأسرات المصرية القديمة والمتوسطة, والكلام بأن الفرس هوما أصحاب تسمية الشهور المصرية, مقدرش أقول عنه غير إنه كلام تافه وسخيف!
…..
أما عن ولادة النتيجة المصرية, برقم السنين الإجمالي, من سنة بداية التقويم, منضاف ليها سنين التقويم الميلادي, ده حصل لأول مرة سنة 1997 فـ مكتبي بحضور صديقي المفكر المصري الراحل (2009) بيومي قنديل, اللي استقبل فكرتي بحماس, واقترح اضافة إن تكون النتيجة المصرية مشابهة للنتيجة الشامية, يعني تكون البداية فـ يناير, ونكتب اسم الشهر المصري مع اسم الشهر الميلادي: يناير/ طوبة – فبراير/ أمشير – مارس/ برمهات .. لخ!
طبعت نتيجة السنة المصرية 6239, ووزعتها فـ صالون محسن لطفي السيد مع احتفالنا بالسنة الميلادية الجديدة يناير 1998 !
خلال سنة من تاريخ صدور أول نموذج للنتيجة المصرية, دارت حوارات ونقاشات وأبحاث ومراجعات, انتهيت منها بصرف النظر عن النموذج الشامي, رغم زعل بيومي, وقلت نمشي مع النتيجة القبطية اللي يعرفها المصريين, حتا الفلاحين بيسموها النتيجة التوتية/ النتيجة الزراعية, وبينظمو بيها أمورهم الزراعية والإجتماعية, وطلعت نتيجة السنة 6240 مرتبطة بالتقويم القبطي, واحتفلت مع أصدقائي بالسنة المصرية والسنة القبطية فـ عزبة النخل بدعوة كريمة من القمص متياس نصر, اللي كان مجهز كورال أطفال وأغاني وطنية, يعني نقدر نعتبر إن دي أول احتفالية شعبية حقيقية وأول ذكر حقيقي للنتيجة المصرية فـ مكان عام وجمهور كبير!
……..
نستعد من دلوقتي للسنة المصرية الجديدة 6265, عشان تطلع فـ معادها يوم الإتنين 11 سبتمبر 2023, ولسة الآمال موجودة, يزيد الإهتمام, وتاخد مساحة من اهتمام الدولة, عشان التقويم من أهم رموز الهوية الوطنية
……
اسمحولي أكرر اللي قولته فـ البوست اللي فات:
التقويم الوطني الواحد ، واللغوة الواحدة ، والأمثال والعادات الواحدة، من أهم اسباب تجانس المصريين
