عقيدة الإستقرار والإستمرار
معالجة اللغوة المصري لزمن الإستمرار بأشكال وأنواع, غطا حاجة الإنسان الطبيعية للتفكير فـ المستقبل, عشان ميبقاش محبوس فـ الماضي اللي راح, ولا فـ الحاضر الصعب والمستحيل!
التفكير بمفهوم الإستمرار, تفكير فـ المستقبل, تجسيد للأمل فـ اللي جاي!
نقدر نشوف فـ قواعد الإستمرار دي, عقيدة المصري, عقيدة البقاء والدوام (جـد), اللي بتلخصها رغبة جامدة فـ الإستقرار والإستمرار!
شرحنا قبل كده إنحياز (اللغوة المصري) للإنسان, بميلها وإعتمادها ع الجملة الإسمية (جملة الفاعل), اللي بتبدأ بالإسم (الفاعل), هنشوف دلوقتي ميل وإعتماد اللغوة المصري علا فعل الإستمرار, وإززاي بتحول الأفعال لـ زمن الإستمرار.
فعل الإستمرار, هوه الفعل الأساسي فـ الجملة الفعلية, بتلات طرق:
أول طريقة: إضافة حرف البه (ب) للفعل المضارع.
فعل الحاضر, أو الفعل المضارع زاي إسمه المعروف فـ قواعد العربي, بيمثل الثبات المستحيل, لأن اللي بتبدأه فـ جزء من ثانية, بينتهي بمجرد ما تكتب جزء من أول حرف فـ نفس الكلمة, عشان كده اللغوة المصري, فرضت حرف أو أداة الإستمرار (بـ), فـ معظم أفعال الحاضر, فتتحول لفعل الإستمرار.
فعل الحاضر: يكتب, بيتحول لفعل الإستمرار: بيكتب.
فعل الحاضر: يشرب, بيتحول لفعل الإستمرار: بيشرب.
فعل الحاضر: يلعب, بيتحول لفعل الإستمرار: بيلعب.
تاني طريقة: إستخدام (كان) لتصنيع زمن الماضي المستمر.
كمان اللغوة المصري, عملت فعل إستمرار جديد من زمن الماضي, ضمت فيه فعل (كان), مع فعل الإستمرار المبدوء بالبه (ب), يعني تقدر ببساطة تحول فعل الإستمرار المصري الخالص, لفعل الماضي المستمر:
كان بيشرب/ كان بياكل/ كانت بتلبس/ كنا بنغني/ كانو بيتخانقو … لخ
تالت طريقة: دعوات الدوام والإستمرار, بحرف اليه (ي) والضمير.
بارضو إبتكرت اللغوة المصري فعل الحاضر المستمر, فـ حالة الدعا, لأن الدعا مرتبط بالمستقبل, بإضافة أداة إستمرار جديدة, وهيه حرف اليه (ي), مع الضماير, لو الفعل لواحده:
ي + فعل + ضمير.
ربنا (ينجحك)!
ربنا (يعزه)!
ربنا (يقويها)!
أو يكون الضمير مع المفعول:
ي + فعل + مفعول لازق فيه ضمير.
ربنا يبارك فيه!
ربنا ينجح مقاصدها!
إلهي يبارك فـ عافيتك!
مع الأسامي فيه طريقتين للإستمرار:
أول طريقة: أداة استمر الحال:
بإضافة نفس الأداة النموذجية (ب):
بمزاجو/ بكيفو/ بسلامتو .. لخ
تاني طريقة: بالميم أداة الوصل (التواصل) المستمر:
بنلاحظ إن بيظهر فـ جملة الوصل صيغة جديدة بتلزق فـ الفعل اللي بعد أداة الوصل.
الصيغة دي, عبارة عن حرف واحد, هوه حرف الميم (م).
شوفو كده التلات عبارات دول, بالعربي وبالمصري:
بالعربي: الذي أعلنوا عنه.
بالمصري: اللي معلنين عنه.
بالعربي: الذين سلموا عليه.
بالمصري: اللي مسلمين عليه.
بالعربي: الذين تكلموا عنها.
بالمصري: اللي متكلمين عنها.
جملة الوصل المستمر, بيتحول فيها الفعل الماضي لزمن الإستمرار بإضافة الميم.
……..
بدل دكتوروهات “حتا” و”ما انفك” بتاعت اللغة الأجنبية الرسمية!, ياريت الدولة المصرية تهتم بلغتنا الوطنية (#اللغوة_المصري), وتعمل لها أقسام فـ الجامعة, عشان نشوف عشرة ماجستير وخمسة دكتوراة فـ عبقرية الإستمرار فـ اللغة المصري!
…….
الحد 30 أبيب, 6264 مصري
موافق 6 أغسطس, 2023 ميلادي
